ne pas moins chastier les meschans que de reconnoistre
les bons seruices des fideles subiects : en
quoy les Roys peuuent commettre des fautes irreparables,
& tres-dangereuses à l’Estat, s’ils
n’obseruent les loix de la Royale Iustice.

[illisible]

Le Prophete Roy connoissoit l’importance de
cette vertu, quand il la demandoit auec tant d’instance
à la Diuine Maiesté, non seulement pour
soy, mais pour son Fils Successeur legitime de sa
Couronne. Seigneur (dit-il) donnés vostre iugement
au Roy, & vostre Iustice au Fils du Prince.
Il pouuoit demander la misericorde, la clemence
la liberalité, la generosité, ou quelque vertu semblable,
mais sçachant qu’elles ne luy estoient pas
tant necessaires, pour l’heureuse administration
de l’Estat que la Royale Iustice, il la demanda
auec instance pour soy, & pour son Fils Salomon ;
& est à remarquer, qu’il desire pour ce ieune Prince
la Diuine Iustice, au moins selon qu’elle peut
estre participée par les mortels ; Mais qu’elle est la
Iustice de Dieu ? sinon la Royale, la Distributiue,
Generale, & Vniuerselle ; Parce que la Commutatiue,
ou particuliere repugne à sa Souueraine
grandeur : La requeste de ce grand Roy,
fust faite si à propos, & trouuée si raisonnable deuant
la Diuine Maiesté, qu’elle merita d’estre
exaucée : & de fait, Salomon a esté quelques années
le plus iuste Prince de son Siecle, comme il
fit voir des l’entrée de son Regne, au debat de ces