considerable au public & dans cette agreable
varieté consiste son excellence.

Il est vray que la Religion est la premiere des
vertus d’vn ieune Prince, & qu’elles luy cedent
volontiers la plus haute dignité, dautant qu’elle
regarde plus particulierement l’honneur &
l’interest de Dieu ; Mais la Royale Iustice la suit
immediatement : son éclat rehausse la personne
d’vn ieune Monarque, & le rend digne de porter
le Diademe. A quoy s’accorde fort bien cette
ancienne remarque des Payens, qui aduertissoient
les Souuerains d’apprendre la Iustice, & de
ne point mépriser les Diuinités.

Mais pour parler clairement de cette matiere,
ils faut sçauoir, que la Iustice qui rend à vn chacun
ce qui luy appartient, se diuise en deux especes,
dõt l’vne se nomme distributiue, l’autre commutatiue,
celle-là estant plus generale & vniuerselle
conuient mieux à vn ieune Monarque, que
celle-cy qui est plus particuliere, & ne s’arreste
qu’aux ventes & aux achapts ; commerce autant
éloigné de la dignité Royale, que propre aux
personnes priuées. Ayant donc entrepris de
traitter en ce Chapitre de la Royale Iustice d’vn
ieune Prince, ie ne m’arresteray qu’à la distributiue,
propre aux Souuerains, qui ont le maniment
de toutes les affaires d’Estat, à qui appartient de
donner les plus hautes charges de la Couronne,
conformément aux merites des Personnes, & de