de quelque nature quelles puissent estre :
Bref ils sont à l’Estat, au dire de Tacite, ce que
Drusus & Neron estoient en la maison des Cesars,
où ils seruoient de bases & de colomnes. Oüy veritablement,
SIRE, ils sont tellement necessaires à
la France quelle reçoit vn notable dommage de
leurs aduersité, & vn insigne bon-heur de leur prosperité
& de leur deliurance.

Ie ne veux pas dire, SIRE, que vostre authorité
depende aucunement d’eux, à Dieu ne plaise :
mais ie veux dire que vostre Majesté a bien plus d’eclat
lors quelle est enuironnée de ces illustres Conquerans
que lors quelle ne l’est pas, ainsi qu’vn
beau diamant lors qu’il se trouue enuironné de plusieurs
autres brillans, ou bien ainsi qu’vn grand lys,
lors qu’il se trouue entouré de plusieurs autres fleurons
au milieu d’vn superbe partere.

De mesme, SIRE, quoy que vostre Maiesté soit
sans doute en estat de faire ce que bon luy semble
sans leur assistance : Quelle puisse proposer, conferer,
resoudre, commander, & faire executer toutes
choses : Que vostre Authorité soit pleniere, absoluë,
souueraine, independante, entée à vostre
Couronne, ayant auec elle la souueraineté du Roy
des Roys qui vous a estably, & portant au frontispice
de sa grandeur, cette haute & sourcilleuse Fpithete
que l’on graua autre-fois au pied d’estail de la
Statuë de Iupiter Olympien, Puissant d’eux mesmes,
elle ne laissera pas de regner auec plus de douceur,
auec plus de plaisir, & auec plus de satisfaction, lors
quelle bannira d’aupres d’elle l’olygarchie, tousiours
accompagnée d’ambitions, de monopoles,
d’enuies, de seditions, & d’vn nombre infiny de
partialitez, quoy quelle soit vne espece de gouuernement
fort raisonnable en apparence : & lors