fait beaucoup de graces aux hommes, de leur faire
apprehender les bonnes maximes sur la fin de leurs
iours, il a dit vne sentence tres veritable au regard
de ceux qui veulent mourir dans leur peché : mais
non pas au regard de ceux qui veulent preuenir de
bonne heure aux inconueniens de leurs Estats,
pour en euiter le precipice.

Ce Prince, SIRE, a toutes les qualitez d’vn homme
propre à bien conseiller & à bien conduire vne
affaire, quoy qu’il ne soit pas des plus âgez du monde.
Et quand vostre Maiesté l’entendra opiner aux
choses d’importance, elle benira l’heure de l’auoir
mis en liberté, & de l’auoir appellé aupres de vostre
personne. Les occasions où il s’est trouué, & les
reuolutions d’affaires qui se sont passees depuis qu’il
a l’honneur de porter les armes pour vostre seruice,
l’ont rendu capable de tout oser, & de tout entreprendre
pour le bien de cette Monarchie. Outre
que treize ou quatorze mois de loisir qu’il a eu à
bien approfondir les Maximes d’Estat dans sa detention,
ne luy ont pas mal appris son deuoir, aussi
bien enuers Dieu que vers les hommes. C’est pourquoy
vostre Majesté ne luy entendra plus proferer
que des paroles de pieté, ny que des sentences de
Politique.

Les Princes du Sang, SIRE, sont à vostre Majesté,
ce que l’ombre est au corps, ce que l’image est
à la chose representée, ce que le rayon du Soleil
est à ce bel Astre du iour, ce que le poinct est à la
ligne, & ce que le cercle est à la Sphere : car comme
ombre ils les doiuent suiure, comme images ils les
doiuent representer, comme rayons du Soleil ils en
doiuent émaner pour éclairer au reste des hommes,
comme poincts ils en doiuent resulter, & comme
cercles ils suiuent ou bien ils doiuent suiure ses reuolutions