qu’elle appellera les Princes de son sang, & les principaux
officiers de sa Couronne en ses conseils ; afin
de resoudre ce qu’il y aura de plus important à decider
pour le bien de cette Couronne.

Ce sera à lors, SIRE, que vostre Majesté imitera
en cette action ces premiers Roys de Perse tant
vantez par Aristote, lesquels decidoient les plus
grandes affaires de leur Royaume en la ville d’Ecbatane,
assis sur vn Trosne d’yuoire, au milieu des principaux
officiers de leur Couronne, pendant que les
Gouuerneurs de leurs Prouinces executoient leurs
Declarations, & leurs Ordonnances. Et quand vostre
Majesté les imitera en ces actions, SIRE, elle
ne fera qu’appuyer de plus en plus, le glorieux Trosne
de sa pieté, & le magnifique Tribunal de sa Iustice,
qui sont les deux Lions qui soustenoient celuy
de Salomon, & qui doiuent estre les deux illustres
fondemens qui doiuent appuyer le vostre. Par
la pieté vostre Majesté reprimera la promptitude
de ses subjets, qui ne sont de leur nature que trop
remuans, & les rangera doucement dans vne parfaite
obeïssance, & par la Iustice elle leur fera voir que
vous estes la veritable Image de Dieu, lequel sans
consideration de personne punit les meschans & recompense
les debonnaires. La Iustice, dit Plutarque,
est la fin de la Loy ; la Loy est l’ouurage du
Prince, & le Prince est l’Image de Dieu qui regit
toutes choses, n’ayant besoin ny d’Appelles pour
le peindre, ny de Phydias pour le tailler, ny de Polyclete
pour le grauer, ny de Myron pour le tirer en
moule C’est luy mesme qui se doit former par la
iustice au moule de son Createur, qui est le plus noble,
le plus beau, & le plus excellent modelle, de
tous les exemples qu’il se puisse dresser luy mesme.
Vous estes Roy d’vn Empire si puissant, que si vos