main sinon pour nous obliger à le perdre ? Ils
veulent l’emporter contre tous les Princes, les
Parlements & les peuples. Voila ce que pretendent
de faire les autheurs de tous nos desordres
quel aueuglement de croire pouuoir reüssir en
vne telle entreprise, quelle obstination de la
poursuiure ? Et quelle rage de s’y vouloir opiniastrer ?
Quoy ! malgré toute la France, r’apeller
l’ennemi de la France, declarer la guerre aux
Princes, aux Magistrats & aux peuples ? C’est
vne estrange Politique qui met tout au hazard
pour ne rien gagner, qui ioüe à perdre vne
couronne pour mettre vn Estranger, vn proscript
sur le throne. Mais s’il manquent à leur
deuoir nous sommes resolus de satisfaire au nostre,
& d’opposer la force à la violence, la generosité,
la constance à l’obstination & la prudence
à leur temerité. Les loix de la Medecine
ordonnent qu’aux maux desesperez il faut des
remedes extremes, & c’est ce qui iustifie ceux
dont nous vsons pour conseruer cet Estat, lequel
est à la veille de se perdre si nous n’vsons
de remedes puissants, bien qu’ils semblent facheux
& du tout extraordinaires, en faisant la
guerre à l’ennemy de l’Estat, n’est ce pas prendre
le party du Roy & luy entreprendre la Conseruation
de sa Couronne contre ceux qui se
seruent de son authorité pour la luy faire perdre ?

Page précédent(e)

Page suivant(e)