Royaume ne peut les esbloüir. Ils cognurent bien
que l’authorité Royale n’estant encore en luy qu’en
puissance, & non pas en vsage, on n’auoit pû l’enleuer
auec luy. Que son depart nocturne en estoit
vne raison, & vne preuue indubitable. Que ceux
qui vsent de cette authorité ne fuyent point, & ne
se dérobent iamais. Que c’estoit vne priuation &
vn abandonnement manifeste de se souuerain
pouuoir que cette euasion timide & indecente
dont les plus foibles mesmes deuroient rougir.

Ce n’est pas
vne marque
de puissance
& d’authorité
que de se
cacher &
fuir.

Ces genereux & ces sages Heros, considerans
donc que le Roy mineur n’vsant point encore de
sa puissance Souueraine ; Et que cette puissance
toutesfois pour le gouuernement de l’Estat ne
pouuant estre en ses mains, & deuant estre en d’autres,
ne pouuoit estre recognuë en celles-là, de ceux
que la crainte & la fuite esloignoient infiniment
d’vne si haute independance, abandonnerent les
lieux d’où ils iugerent qu’elle s’estoit esuanoüye, &
vindrent chercher ceux-là où elle s’estoit acheminée.
Comme les belles fleurs qui ne peuuent viure
sans suiure d’vn mouuement continuel l’astre donc
elles reçoiuent la chaleur & la vie. Ainsi ils abandonnerent
le Roy pour le seruir ; Si l’on abandonne
au moins ce dont on porte tousiours l’amour
dedans le cœur, & l’image dedans la memoire. Si
l’on peut dire abandonner ceux-là dont on embrasse
ardemment la querelle, & pour lesquels on