la France aussi miserable, que l’autre auoit
souhaitté de la rendre triomphante & glorieuse.

Ie sçay bien qu’on me peut iustement accuser
d’auoir presté mon consentement à sa reception,
& de l’auoir estably dans le rang qu’il s’efforce
de maintenir auec ses armes, mais ne sçait-on pas
que ie ne le receus que sous la caution du feu Cardinal,
à qui i’auois donné toute ma creance, &;
puis que toute la France y fut trompée auec moy,
ie pense auoir trouué mon excuse dans les feintes
qu’il pratiqua pour nous surprendre : du
moins ie croy que cette faute ayant moins esté
de consentement & de dessein que d’erreur, est
pardonnable à la foiblesse humaine, qui ne peut
auec toutes les lumieres de la prudence, percer le
voile qui couure les secrets de l’auenir, & les noires
intentions des méchans hommes. Il est vray,
que si l’on est souuent deçeu dans les apparitions
des Anges, qui nous apparoissont sous telle forme
qu’il leur plaist, on peut estre surpris auec
autant de facilité, à la premiere veuë des personnes
accoustumées à feindre & à se déguiser,
pour faire glisser agreablement sous ce fard
leurs tromperies dans l’ame de ceux qu’ils veulent
surprendre : & comme ce n’est qu’aux persuasions
& au discours, & mesmes à la separation
qu’on fait le discernement des bons & des mauuais
genies, qui ont daigné nous apparoistre :
Ce n’est aussi qu’à la pratique & à l’vsage qu’on