obeyssance, s’il vous plaist de vous soumettre
vous-mesme aux loix du ciel, font tousiours dans
les lieux voisins de leur Camp, & sur toutes les
auenuës de cette grande Cité, qui ne souspire
qu’aprés le bien de vostre retour. Songez de grace,
quel sujet met toutes ces troupes en campagne,
& quel nom on donne vulgairement aux
vostres, pour connoistre que cette guerre n’est
entreprise, & soûtenuë que pour l’interest du seul
Mazarin. Escoutez les gemissemens & les plaintes
de vos peuples, qui reclament le secours de
vostre Majesté contre l’oppression qu’ils pensent
ne souffrir que pour son sujet : escoutez toute
la France, qui l’accuse, & qui continuë dans ce
sentiment depuis plusieurs années, & croyez que
s’il n’est coupable, il faut qu’il soit le plus malheureux
du monde, pour auoir excité tant de
murmures, tant de seditions & de reuoltes : Ce
qui n’est pas moins digne de precaution, que
d’auoir commis de grands crimes, qui sont iustement
reprochez.

Mais pour vous monstrer que cette peste publique
est la veritable cause de la ruine de vostre
Estat, & doit passer pour vn prodige en vostre
esprit, aussi bien qu’en celuy des autres François,
ie veux vous prouuer par la comparaison que i’en
veux faire auec le feu Cardinal de Richelieu, que
si le premier parmy ses hautes vertus eut quelques
taches, qui le rendirent mal-voulu de la