plus grande partie des peuples : le second n’ayant
que des defauts, est veritablement digne de
l’horreur & de la haine de tout le monde.

Le Cardinal de Richelieu par toutes sortes de
moyens, & par vne infinité d’exactions, qu’il
fist sous mon auctorité, s’efforça de mettre des
richesses immenses dans sa maison : mais le bon
vsage qu’il fist de la plus grande partie, l’excuse,
aussi bien que l’Histoire fait grace pour les mesmes
fins à Vespasian, accusé du mesme crime,
quando male partis bene vsus est. Ce qui ne veut
dire autre chose, sinon qu’il employa fort bien
ce qu’il auoit tres-mal acquis. En effet, ce Cardinal
moins interessé, ne se seruit-t’il pas de mes
thresors, comme d’vne puissante machine, pour
remuer toute l’Europe, confondre l’orgueil de
l’Empire & de l’Espagne, & pour estendre mes
conquestes de tout costez sur les terres de mes
ennemis ?

Mazarin au contraire ayant tesmoigné la mesme
soif & la mesme auidité, ne s’est seruy des
biens arrachez par force à vos peüples, que pour
en faire les instrumens des nouuelles chaisnes,
qu’il leur prepare, & pour entretenir dans cet
Estat des guerres, qui ont attiré les ennemis iusques
dans son centre, & les ont remis en possession,
presque sans coup ferir, de la plus grande
partie des Villes que i’auois heureusement conquises
sur eux.