On le souffre pour faire court
Aux Prouinces comme à la Cour,
Et loing de le punir en France,
Au contraire on le recompense.
Encore d’autres moyens auons
Que bien conseillez reseruons,
Puis que celuy-cy l’on dedaigne.
Aux assisses d’vn autre regne
Où connoistra posterité
Qu’en ce trop viste on a esté,
Et qu’on fit chambre de Iustice
Pour manger nouueau pain-d’Espice,
Et non point pour aucuns subiectz
Vtiles à Princes & subjectz,
Ainsi comme tout chacun conte :
Qui est pourtant vn grand mesconte.
Donc sur nostre appel droit faisant
Faut, Nosseigneurs, dés à present
Declarer cette belle Bulle
Vitieuse, abusiue & nulle,
Pour les cas touchés cy-dessus
Et bien d’autres qui ne sont sceus :
Du moins nous donner sur-seance
Ou plustost de bonnes deffences,
Faisant sur peine d’attentat
Demeurer choses en estat.
Que si par vn coup qui nous outre
Nonobstant l’appel, on passe-outre
Sans nullement y deferer
Affin de nous desesperer,
Non plus que Requeste Ciuile
De chicane dernier azyle,
Ou proposition d’erreur,
Voyes de droit & de douceur :
Du moins ayans esgard aux offres
Que faisons de vuider nos coffres
De la finance qu’auons pris,
En vertu de legions d’Editz,
Plains de Cire de mainte sorte
Mais non pas pourtant assez forte,

page précédent(e)

page suivant(e)