Anonyme [1649], REQVESTE DES PARTISANS PRESENTEE A MESSIEVRS DV PARLEMENT EN VERS BVRLESQVES. , françaisRéférence RIM : M0_3489. Cote locale : C_8_56.
Page précédent(e)

Page suivant(e)

-- 6 --


Sy que sans nostre credit prompt
L’Estat eust receu maint affront.
Cependant nous donnant la chasse,
Comme à quelque maudite race,
De nous outrager on permet,
Et par tel Edit on nous met,
Nous, dont l’argent soustiẽt la France,
Dans le danger de la Potence.

 

 


Nosseigneurs, ce consideré,
Il vous plaise de vostre gré
Nous receuoir par ces presentes
Appellans de telles patentes,
Tant comme d’abus bien constant
Qu’aussy de juge incompetant.
Mais d’incompet assez notoire
Ainsi qu’en auons bon memoire ;
Et de tel enregistrement,
Comme fait precipitément,
Sans piece veuë, à la volée,
Sans parties ouyes ou appellees,
Sur des deffauts mal obtenus,
Et dires de nouueaux venus
De peu d’aage & d’experience
Dans les matieres de Finances,
Qui ne peuuent encore sçauoir
Combien il fait bon auoir
A titre de bon Pensionnaire,
Ou bien en quelque autre maniere.
Tant y a que nous soustenons
Que nos moyens d’appel sont bons,
Et soit au fondz, soit en la forme
Y a vice en telle reforme,
En la forme, bas iusticiers
Ne sont iuges de Financiers.
Or Parlement (c’est vostre grace)
A seulement Iustice basse,
Et si chastier il nous faut
Ce doibt estre Chambre d’En-haut,
Au fonds voler Prince & Patrie
N’est pas vn crime qu’on chastie.
Page précédent(e)

Page suivant(e)

Anonyme [1649], REQVESTE DES PARTISANS PRESENTEE A MESSIEVRS DV PARLEMENT EN VERS BVRLESQVES. , françaisRéférence RIM : M0_3489. Cote locale : C_8_56.