Ayant pour durer longuement
Besoin du sceau du Parlement,
Et de ces plumes souueraines
Qui rendent patentes certaines
Et sans quoy n’y a seureté
D’aduancer à sa Majesté.
Donnez vne ordonnance prompte.
Que parties viendront à compte
Si deuons, voulons en ce cas
Payer comptant les reliquas,
Que Iustice, qui nous lanterne
Contre seule bource decerne,
Veniat, ou prise de Corps,
Si bien que corde en soit dehors,
Assez ce nous est d’infortune
De donner toute nostre pecune
Sans estre encore comme Iobetz
Pendant d’oreilles de gibetz.
Et vous, Nosseigneurs, des Enquestes
Qui grondez comme des Tempestes,
Songez sans ruer plus grands coups
Que sommes hommes comme vous ;
Que vostre corps qui si haut clame,
Cesse de chanter nostre game,
Suiuant l’exemple du Seigneur,
Qui ne veut la mort du pecheur,
Ayes compassion de toute
La famille de la Maltoute,
Aucuns de vous bien piaffans
Ont l’honneur d’estre ses Enfans :
Du Ciel n’attirez la colere
En faisant mourir vostre Mere,
Et sans deliberer sauuez
La vie, à qui vous la deuez.
Pour vostre sang fermez la bouche,
Et qu’autre interest ne vous touche.
Faisant ainsi vous ferez bien,
Et mieux encore, n’en faisant rien.

FIN.