& declaré ennemy du Roy & de l’Estat
par Arrest de nosdits Seigneurs qui doiuent registrer
& verifier les traitez de paix pour les rendre
asseurez, perdurables & autentiques. En second
lieu, ne fait-il pas gentiment le chien couchant,
afin de venir à bout de ce qu’il pretend &; d’obtenir
ce qu’il demande, lors que loüant comme à
dessein de flatter, il se soûmet au iugement de nosdits
Seigneurs, & desire auoir pour arbitre de la
paix cet auguste Senat, tellement connu & celebre
par toute l’Europe, que des plus puissans &
Souuerains Princes d’Allemagne, ainsi que remarquent
nos histoires, l’ont voulu choisir pour
iuger de leur important different qu’aucun autre
n’auoit pû terminer.

En troisiesme lieu il emprunte la forme du
lion, quand par vne contenance fiere & arrogante
il declare qu’il a dix huict à vingt mil hommes
en Flandre qui peuuent attaquer auec auantage
nos places frontieres, delaissées & dépourueuës
de garnisons, comme si les François tout diuisez
qu’ils sont par la guerre ciuile, ne pouuoient se
reünir assez promptement pour combatre & s’oposer
genereusement aux progrez de leurs ennemis
communs. Mais enfin ne deuient-il pas le rusé
& cauteleux regnard, lors qu’il offre ses troupes
à nosdits Seigneurs du Parlement pour leur