vn grand Nauire au milieu des tempestes
d’vne mer courroucée, poussé des vents,
agité des orages, sans arbre, sans voiles, sans timon,
abandonné de son Pilote, & delaissé des
autres, qui preuoyant son prochain naufrage
n’ont autre esperance que de se sauuer sur ses débris,
& de gaigner le Hâvre. Vous voyez dans le
mesme Tableau quantité de personnes, qui considerent
auec autant de pitié que d’estonnement,
la perte de ce prodigieux Vaisseau, & semblent
à leur posture estre entierement animés contre
des traistres, qui ayant sous main couppé son
mast, ont medité sa perte & procuré sa ruine.
L’on voit aussi dans cette Foire des tableaux qui
representent des joüeurs de gobelets, des Charlatans,
qui font mille tours de passe-passe & de
soupplesse : des fins couppeurs de bourses, & d’autres
gens, qui se disposent à danser sur la corde.
Et tout auprés de ces tableaux vos yeux y en enuisagent
d’autres, presque de la mesme grandeur,
qui portent la figure de personnes assez mal habillées,
qui auec vn visage triste & morne, mettent
le doigt dessus leur bouche, pour dire qu’elles
n’oseroient se plaindre de ceux qui les joüent,
ou qui les volent, & qu’il faut celer vn mal qui
n’a point de remede, aussi bien qu’vn tort que
l’on ne peut vanger. Ne iugeriez-vous pas que

Page précédent(e)

Page suivant(e)