soubmettre auec tant de lacheté aux ordres du Mazarin :
Ainsi comme l’vn appuye l’autre par vn mauuais
principe ; L’autre en reuanche ne se sert de luy qu’auec
mauuais motif : quiconque depescheroit tout cela du
monde seruiroit bien l’Estat.

LE CONSEIL
d’Espaigne.

LE passé, nous fait regarder le secours d’Espagne
auec deffy : quelques Politiques ne peuuent point
se persuader qu’il y est maintenant de la sincerité, parce
qu’il n’y en a jamais eu dans ces conionctures : le prejugé
n’est pas desraisonnable : mais il n’est pas verirable.

L’Espagne veut la Paix generalle : La France la veut
aussi : Les Calamités domestiques n’ont pas moins desolé
ce Royaume voisin que le nostre : La suitte des
guerres seroit comme vn espece de rechute à ses maladies
d’Estat : Il ne peut esperer la Paix, qu’en conspirant
à la perte de celuy qui ne peut la souffrir.

Quel grand bien peut esperer l’Espagne, en fomentant
nos diuisions : Elle sçait qu’il ne nous est
pas plus difficile de nous reünir que de nous diuiser :
Si nous la voyons agir de mauuaise foy, en vne affaire
qui n’est pas moins importante pour elle que
pour nous, nous rentrerons bien tost en bonne intelligence,
pour fondre sur elle auec toutes nos forces :
Elle sçait comme nous la traitons, quand nous sommes
bien vnis, il faut qu’elle s’entremettre de nous
reconcilier nous mesmes pour se reconcilier auec
nous.