Duval, Jean [?] [1652], LA TROISIESME PARTIE DV PARLEMENT BVRLESQVE. DE PONTHOISE, Contenant la Response à l’Anti-Burlesque du sieur D. L. R. Et le nom & les qualitez de trois nouueaux Renegats. Par l’Autheur de la premiere & seconde Partie. , françaisRéférence RIM : M0_2701. Cote locale : B_15_38.
Le dernier qui ne vaut pas mieux, Et qui n’est pas moins odieux, Puis qu’il a fait la mesme frasque, Est originaire de basque, Ie ne sçay si c’est quolibet, Mais on le nomme FIEVBET ; Son pere est chef de sa famille, Quoy qu’il ait porté la mandille, Ce qu’on croira facillement, Parce qu’vn chacun sçait comment Cette espece de Valletaille, A courir est de bonne taille : Ie ne sçay si verd, iaune, ou gris, Portoit l’homme que ie descris, Bien sçay-ie qu’vn payeur de rente, (Et ne croyez pas que ie mente) L’auoit pris pour estre laquais, Et le faisoit bien trotter, mais Quand il fut aduancé dans l’aage, Prest d’entrer en apprentissage, Il augmenta de dignité, Et de trotin tousiours crotté, S’estant mis dedans l’escriture, On luy donna l’habit de bure, On en fit vn petit Commis, Il se fit là quelques amis, Qui, voyans sa belle apparence, Le pousserent dans la Finance, Et quand il y fut, que fit-il ? Il y fut vn volleur subtil, Et pratiqua maintes bricolles, Pour attrapper maintes pistolles : Comme l’autre il fut Tresorier, Ainsi de simple auanturier, Et de malautru tournebroche, Il mit tant de deniers en poche, Qu’il a laissé tous ses enfans, De biens & d’estats triomphans : Car, soit sur lais, ou gens d’Eglise, Il trouuoit tout de bonne prise.
Celuy-cy qui dans le Senat S’est fait souuerain Magistrat, N’a pas vn seul brin de doctrine, On le peut bien voir à sa mine ; Son nez aquilin en dedans Donne des parfums mal plaisans, Et pour n’en dire dauantage, On en peut faire vn alliage, Pour faire entrée en vn Ballet, Auec VERSIGNY le Turquet, Son œil fait à l’escarpollette Tourne comme vne giroüette : Enfin cet homme de brelan A les yeux faits comme vn merlan.
Quand ils eurent trauersé l’oise, Et qu’ils furent dedans Pontoise, Dieu sçait si l’on fut resioüy, Vous m’en croirez si ie dis oüy, Ce iolly Parlement de balle, A leur descente les regalle D’vn fort gracieux compliment, Voicy donc à peu pres comment Celuy qui porte la parolle, Leur dit, allors qu’il les accolle, (Et l’on ne peut pas dire mieux, C’estoit le PRESIDENT COIGNEVX) Ha Messieurs ! que la Cour est aise : Ca que pour elle ie vous baise, Allez, vous auez fort bien fait, Plus d’asnes on est, plus on brait, Venez & sans ceremonie Prendre place en la compagnie, Au lieu qui n’est qu’vn galetats, Et qu’vn nid propre pour des rats ;
Duval, Jean [?] [1652], LA TROISIESME PARTIE DV PARLEMENT BVRLESQVE. DE PONTHOISE, Contenant la Response à l’Anti-Burlesque du sieur D. L. R. Et le nom & les qualitez de trois nouueaux Renegats. Par l’Autheur de la premiere & seconde Partie. , françaisRéférence RIM : M0_2701. Cote locale : B_15_38. |
|||||