Que dés ce mesme iour la Ville & le
Chasteau se rendroient. Et que lesdits habitans
receuroient chez eux vne garnison de
deux cens hommes seulement pour le present,
ausquels ils ne seroient obligez de fournir
autres choses que ce qui se donne d’ordinaire
aux autres garnisons.

Sur les quatres heures du soir entrerent
dans le Chaste au soixante caualiers commandez
par vn Cornette, attendant l’ordre
de Monsieur le Prince pour le gouuernement
de la place, aux fortifications de laquelle on
trauaille incessamment. Cette prompte reddition
a beaucoup estonné la ville de Senlis,
& mesme quelques-vns, nous veulent persuader
qu’à cette nouuelle elle auoit enuoyé
offrir ses clefs à Monsieur le Prince, mais le
plus certain est que Monsieur de S. Simon,
qui en est Gouuerneur, & qui trauaille depuis
long-temps à fortifier les endroits plus
foibles de cette ville, a fait resoudre les habitans
à tenir bon, & ne se rendre pas sans
voir au moins vn siege formé deuant leur
place ; à quoy il y a apparence que se dispose
Monsieur le Prince, faisant continuellement
filer ses troupes de ce costé là.