Quand le bon Demon de la France
Touché de voir nostre souffrance,
Fit que perdans le iugement
Ils se prirent au Parlement,
Se promettant que leur malice
Triompheroit de la Iustice,
Et que ce grand Corps atterré
Leur repos seroit asseuré.
La Polette fut la machine
Qui fut destinée à sa ruine,
Et le piege que l’on tendit
Aux Officiers pat vn Edit,
Lequel mettoit en apparence
Leurs Offices en asseurance.
On demandoit par cet Arrest
Comme par maniere de prest
Quatre années de tous leurs gages,
Mais lors que l’on vint aux suffrages,
Il parut, & non sans raison,
Dessous le miel quelque poison,
Dont la liqueur estoit mortelle
A la santé de l’escarcelle.
En mesme temps de tous costez
Des autres corps les Deputez
Attaquez de pareilles craintes,
Arriuent, parlent, font leurs plaintes
Contre la persecution,
Implorent la protection
De ceux qu’ils appellent leurs Peres,
Disent l’estat de leurs miseres,
Et que sans doute ils sont perdus
Si par eux ne sont defendus,
Demandant que chacun s’vnisse
Pour resister à l’iniustice,
Et remonstrer coniointement
A la Reyne ce traitement.
Cette affaire mise en balance
Fut estimée de consequence,
Et comme il ne faut sottement
S’embarquer, ny legerement,

Page précédent(e)

Page suivant(e)