des Princes du Sang, serons assembler les Cours Souueraines
du Royaume en lieu libre & seur, afin d’y apporter
l’ordre conuenable & necessaire.

VII.

Promettons aussi de faire exactement executer &
inuiolablement obseruer les loix du Royaume, & particulierement
les Declarations & Arrests données contre
Mazarin, pour le bien commun de tous les ordres de
l’Estat & la seureté de tous les bons & fidels suiets du
Roy.

VIII.

Ferons maintenir & entretenir les anciennes alliances,
traictez & confederations renouuellées par le seul
Roy auec les Princes, Potentats & Republique est rangeres,
amis, alliez & confederez qui sont en la protection
de la Couronne, & restablir pour cét effet, & remettre
en la conduite des affaires de l’Estat, les anciennes
Maximes du feu Roy, dont il s’est si heureusement
serui durant son regne pour la seureté de son Estat, &
la paix publique de la Chrestienté, desquelles l on s’est
departy depuis sa mort.

IX.

Promettons en outre de nous opposer soubs l’authorité
du Roy par tous moyens à nous possibles, mesme
par nos iustes armes & assistance des bons alliez & confederez
de cette Couronne à tous ceux qui voudroient
empescher l’effet de cette Vnion, en laquelle nous n’auons
autre but que de conseruer au Roy l’authorité &
dignité de sa Couronne, affermir son Sceptre en ses
mains & de ses legitimes successeurs, & soubs la commune
liberté des François, maintenir nos vies, biens,
honneurs & dignitez contre la desloyauté & perfidie de
celuy qui a coniuré nostre ruine auec celle de la maison
Royale & de tout le Royaume.