Le mesme iour le Cardinal ne fut pas plustost
arriué à Pontoise, qu’il vit mourir son cher Neueu
Manzini : Ie croy que iamais le Cardinal n’auoit
pleure que ce iour-là, mais il pleuroit comme
vn veau, tant il estoit inconsolable, car le
Roy mesme ne s’en pouuoit consoler, & pour
marque de sa faueur on luy mit cette Epitaphe.

Quelqu’vn pour l’acheuer de peindre luy donna
encor vn mauuais presage de cette perte, luy racontant
que le Mareschal d’Ancre perdit sa fille
peu de temps auparauant sa mort.

Le lendemain iour d’assemblée, Messieurs les
Deputez écriuirent au Parlement vne lettre, par
laquelle ils mandoient qu’ils auoient receu à minuit
vne lettre du Roy, pour aller trouuer Sa
Majesté à Pontoise, ce qui allarma tellement
Messieurs les Princes & les Bourgeois qu’on cessa
l’assemblée & on courut aux armes. Monsieur
le Prince y mena vne partie de son armée & trois
ou quatre cens Bourgeois volontaires qui le suiuirent.
Son Altesse Royale mesme y voulut aller
en personne, ce fut cette fois là qu’ils reuinrent,
ayant reconnu la trahison de Mazarin : mais
comme dit le Prouerbe, à trompeur, trompeur
& demy : maintenant qu’il y a vn nombre assez