des Chirurgiens, qui auront soin de vostre personne.

Manzini. Mon Oncle, ce n’est pas ma playe
qui m’afflige, mais c’est qu’on a dit au Roy qu’estant
reuenu du combat sans estre blessé, i’auois
prié vn Caualier de donner vn coup de pistolet
dans le ventre de mon cheual, de crainte que Sa
Majesté ne me reprochast que ie n’y estois pas
allé, & que le Caualier m’auroit frappé au lieu
du cheual, cela me met au desespoir.

Maz. Mon Neueu, ne vous affligez point de
cela, i’empescheray bien que le Roy aye cette
croyance ; sçauez-vous pas que tout le monde
nous en veut, mais ie sçay bien que le Roy ne
croira pas ces imposteurs-là quand ie luy auray
parlé : ils eurent encore quelques autres discours
ensemble, & puis ayant esté pensé, le Cardinal se
retira incontinent apres Sa Majesté, pour le laisser
reposer.

Le lendemain le Cardinal tira ses chausses,
car le Roy s’en alla à Pontoise, & l’armée décampa
pour aller du costé de Senlis : ainsi nos
Deputez furent leurez, car le Garde des Seaux
leur dit, attendez-moy sous l’orme : Le Roy
vous enuoyera sa response icy. Neantmoins par
respect ils voulurent attendre, quoy que les
Princes auec beaucoup de Bourgeois sortirent de
Paris pour les aller querir ; & de fait on leur en
fit instance, mais ils voulurent tenir leur parole.