Faschez seuls de ce qu’ils n’ont pas
De ces parfumez ceruelats.
Tout y paroist plein d’allegresse
La seruante suit la maistresse
Tout paroist gaillard & dispost
Les femmes & filles font des sauts
Les caualiers y font les drolles
Les cheuaux font des caracolles ;
Il n’est pas iusques au chien roquet
Qui ne fasse le freluquet,
Qui ne fasse postiqueries
Saute, faisant des singeries
Tantost courant vn peu deuant,
Apres son maistre demeurant,
Tantost folastrant à la guiche,
Tantost fuyant comme vne biche,
De sorte que chiens & cheuaux
Mulets, & autres animaux
Desirent estre aussi de la feste
L’vn hannit, clabaude, tempeste :
Cela ioint aux grandes clameurs
De nos iolis voyageurs
Fait tel bruit par toute la plaine
Qu’il s’entend au delà de seine
Fait courir comme des chasseurs
Quelques Mazarins de voleurs
Qui cachez sur l’autre riuage
Attendoient là quelque pillage
Mais gangnent au pied quand faisons
Ce grand bruit pareil aux canons
Ie vous ay fait cette remarque
Vn peu deuant que ie m’embarque
Et monte dedans le batteau
Qui m’attend à present sur l’eau ;
Car i’apperçois que la lumiere
Ira bien-tost à la riuiere :
Permettez moy de m’en aller
Ie preuois qu’il faut detaller
Pour celles-là qui sont derriére
Ie crains bien tost les estriuieres
Et i’ay grand peur que le mary
Ne se ressente de Vitry

Page précédent(e)

Page suivant(e)