mil l. d’vn seul satyre : Vn de la compagnie ayant dit, que ce
qui estoit le plus à admirer, estoit que ces superbes bastimens, &
cet amas prodigieux de curiositez si rares & si precieuses, estoient
l’ouurage de six ans, ce que des Monarques n’auroient peut estre pas
fait en deux cent : tout le reste de la compagnie ne repartit que par
vn esleuement d’épaules. Tout ce qui me déplut, & qui doit toucher
V. E. est, que parmy vos meubles on a trouué iusques à la
cassette des langes du Roy : Il faut que ce que vous auez emporté
dans tant de chariots soit de grande consideration, puisque vous
auez encore laissé vne piece si remarquable, & qui apreste bien à
parler. L’autre raison, & qui m’a le plus persuadé est, que quand
tout Paris, iusqu’ux enfans à la mammelle, sçauroit que vous auez
peut-estre plus d’argent & de pierreries, que Monarque de l’Vniuers :
Quand l’Abé Mondin auroit donné au vray l’inuentaire de
vos meubles, & Cantarini celuy de l’argent que vous auez dans les
banques : Qu est-ce ie vous prie de Paris à comparaison de tout le
reste de la France ? Comment serõt instruits de vos affaires ceux qui
sont esloignez de plus de cent lieuës, puisque ceux-là mesme qui
entendent les cloches de Paris ne sçauent pas qui vous estes ? Sçauez-vous
bien que la pluspart entendant parler de vous auec tant
d’hiperboles, comme font les flateurs, s’imaginent que vous estes
vn homme de l’autre monde, & que vous n’estes pas fait comme
les autres ? Ie voudrois que vous eussiez entendu la conference
des paїsans de Montmorency & de Saint Oüen, sur le sujet
de ces mouuements. V. E. seroit pasmée de rire, ces bonnes
gens croyent que vostre escurie est trois fois plus grande que Paris,
encore que vous n’ayez d’ordinaire que cent, ou six vingts pieces
de cheuaux de prix ; Que les chanteurs que vous auez fait venir
d’Italie, sont des femmes qui n’ont pas ce qui les distingue d’auec
les hommes ; Et appellent les Allemans qui sont autour de Paris
des Lauements, comme si les Parisiens à l’imitation de ceux de
Ierusalem durant leur siege, auoient aualé leur or, & que vous voulussiez
le leur faire rendre (sauf le respect de V. E.) par le derriere,
ou les faire creuer à force de lauemens I’ay donc eu grand
sujet de parler comme i’ay fait : Car V. E. doit sçauoir que hors
Paris on adiouste autant & plus de foy à mes Gazettes qu’a l’Euangile.
Et ie ne doute point qu’aussi-tost qu’on les aura leuës dans
les Prouinces, on ne soit desabusé de l’impression qu’à peu faire
l’Arrest du parlement, mon seul deplaisir est de n’auoir pas dit que
vous demandiez l’aumosne, on auroit fait la queste pour vous dans

Page précédent(e)

Page suivant(e)