qui luy ont tousiours differé cet honneur, appellé le
tres Chrestien fils aisné de l’Eglise, qui sont les qualitez
propres à luy seul, que les Papes donnerent ce nom de
tres Chrestien à Charlemagne, qui la laisse hereditaire
à sa posterité, les autres l’ont appellé le Roy des Roys,
Secundum Tempus, autres le second Soleil sur la terre,
autres Empereur absolu, il à de tout temps tenu le premier
rang, c’est donc a iuste raison que ce deuot & affectionné
peuple affluë de toutes parts, pour voir ce debonaire
& aimable Prince, & pour voir les trais gracieux,
que Dieu à imprimé en sa face Sacrée, mais
quand tous les yeux de la nature seroiẽt fixes à la splendeur
d’vn si precieux obiet ils seroient offusqué par ce
Diuin éclat, comme Iadis ce temeraire Philosodhe, regardant
cét autre Soleil trop fixement au milieu de son
actiuité & de sa course, du moins les peuples pour charmer
agreablement leur veuë sur ce bel astre Royal, il
faudroit des Siecles entiers pour en contempler la beauté
& excellence, que Compiegne a rauy la gloire à la
Metropolitaine du monde, & à la plus noble pour la
Maiesté qu’elle enferme dans son sein, qui a esté la plus
desolée & digne de compassion, pendant vn si long espace,
qui a comme plus de huict mois, pendant lequel
temps, cette Royalle ville à esté épleurée & comme enseuelie
dans vn triste neant par la priuation d’vn si grand
Monarque, c’est donc à ce coup que sa ioye est reuenue
par l’aspect de cette Maiesté, il faut maintenant mettre
en campagne les neuf sœurs pour publier la ioye &
absorber son contraire, qui a esté extreme, sus donc
mes Muses, éueillez vous, pour parler de cet Auguste
Roy.

Qualitez qui ne
conuiennent
qu’à nos Roy.