d’vne part le Cardinal Mazarin les auoit exclus
de tout accez auprés du Roy, & de la Reyne Regente,
& osté toute esperance de reconciliation,
n’ayant pas voulu souffrir que les Deputez qu’ils
enuoyerent pour cét effet à leurs Maiestez, incontinent
apres leur depart de cette Ville, eussent audiance
sur les tres-humbles remonstrances qu’ils
auoient à faire sur ce suiet, & que de l’autre ils ne
pouuoient plus prendre d’asseurance en la parole
du Cardinal Mazarin, qui la leur auoit faussée
desia à diuerses fois ; mesmes apres la leur auoir
solemnellement donnée entre les mains de Monseigneur
le Duc d’Orleans : Et en effet, quelle asseurance
pourroit on iamais prendre en la foy
d’vn homme qui n’a pas craint de violer la seureté
& la liberté commune, & prophaner vne réiouïssance
publique par la capture de ceux du Parlement,
qui auoient le mieux merité du Roy, &
du peuple, au milieu d’vn champ de triomphe celebre,
en l’honneur des victoires de nostre Monarque ?
mesme en dernier lieu, d’enfraindre vne
Declaration concertée & resoluë, auec la Reyne
& les Princes, pour le soulagement des peuples,
la restauration de l’Estat, & le restablissement des
reuenus de sa Maiesté ; & qui apres ces honteuses
& trop hardies tromperies, a eu l’audace d’enleuer
nuictamment le Roy, de calomnier le Parlement,
comme s’ils eussent entrepris contre la personne
de sa Maiesté, de susciter vne cruelle guerre

Page précédent(e)

Page suivant(e)