est permis à chacun de deffendre sa propre vie
contre toute sorte de violence, & si la nature a armé
& muny toute sorte d’animaux pour cét effet,
il est sans doute bien iuste, qu’vne si excellente
compagnie, & vne si populeuse Cité, se garantisse
contre la faim & l’espée, par la force & les
moyens qu’elles en ont ; ce qui est d’autant plus
raisonnable & legitime, que d’vne part Paris est
la plus importante, & la premiere Ville du Royaume,
le magnifique siege de nos Roys, & le fonds
le plus considerable, & le plus asseuré de leurs finances,
& que d’autre part le Parlement est cét
Auguste Senat, où le Roy tient son lict de Iustice,
où se rendent les Arrests, ou plustost les oracles
que toute la France reçoit, & dont l’equité est
venerable, mesme aux Estrangers, où les Edicts
& Ordonnances du Roy prennent leur plus certaine
authorité, n’estans reputez iustes & salutaires,
qu’apres qu’ils y ont esté verifiez, où se resoluënt
& authorisent les Traitez de Paix, les entreprises
de guerre, les Regences pendant la minorité
des Roys, les mariages & apanages des Princes,
& les autres plus importantes affaires de
l’Estat.

D’ailleurs, la deffence du Parlement, & de la
ville de Paris, est d’autant plus iuste, qu’ils n’auoient
autre voye pour se garentir de la cruelle
vengeance qui alloit tomber sur leurs principales
testes, que celle de la resistance, d’autant que