allegement aux souffrances du pauure peuple, remis le Roy en la
plaine possession de ses reuenus, & restably l’Estat chancelant de
toutes parts ? Au contraire, s’ils estoient criminels en cela, ce seroit
pour auoir trop long-temps dissimulé le mal, comme ils ont fait
pour l’honneur de la Regence : Estant certain qu’ils ne pouuoient
differer plus long temps d’y apporter le remede necessaire, par vne
scrupuleuse veneration de l’authorité de la Reyne, sans se rendre
coulpables de la ruine de l’Estat, & charger leur memoire d’vn
honteux & eternel reproche, d’auoir manqué au Roy & à leur Patrie,
ainsi qu’il arriuera sans doute à ces Ministres d’Estat, qui pour
des considerations lasches, & des interests qui sont connus à tout
le monde, ont adheré iusques icy, & adherent encore à present, aux
pernicieux conseils du Cardinal Mazarin, contre leur propre honneur,
leur propre conscience, & le seruice qu’ils doiuent au Roy
& à leur Patrie.

Finalement, nous auons vne marque certaine de la Iustice de
la cause que nous soustenons, en la benediction que Dieu verse
tout euidemment sur ce party, & sur tous les desseins du Parlement,
en ce rencontre, & en la protection particuliere qu’il demonstre
visiblement sur la Ville de Paris, en diuerses façons, notamment
en la longue & presque miraculeuse subsistance d’vn si
grand peuple, & en l’Vnion estroite que l’on y a remarqué iusques
icy, & qui s’affermit de iour en iour, nonobstant les efforts & artifices
du Cardinal Mazarin, & de ses Supposts, pour la rompre.
Et ainsi bien loin de me départir d’vn si vtile & raisonnable dessein,
qu’au contraire, i’espere de vostre generosité & de vostre affection
au bien public, que vous ioindrez vos vœux & vos forces à celles
du Parlement & de la Ville de Paris, pour la gloire de Dieu, le
soustien de l’Estat, & le repos de vostre Patrie.

FIN.