bien. Que l’authorité du Roy degeneroit en vne tyrannie ouuerte
par la mauuaise foy du Cardinal Mazarin, & que l’Estat estoit dans
le penchant d’vne ruine ineuitable : Ils en ont fait à diuerses fois
leurs tres-humbles remonstrances à la Reyne Regente, lesquelles
finalement ont esté trouuées si iustes & si equitables, que nonobstant
tous les obstacles, & les artifices dont le Cardinal Mazarin
se seruit pour l’empescher : Leurs Maiestez leur accorderent au
mois d’Octobre dernier, par l’entremise & le consentement des
Princes, la Declaration, dont il a desia esté parlé pour la reformation
des abus qui auoient eu cours iusques alors, par laquelle le
peuple est aucunement soulagé, les reuenus de sa Maiesté restablis,
le repos des gens de bien asseuré, & tout l’Estat puissamment affermy.

Cette Declaration n’eust pas plustost esté publiée, que le Cardinal
Mazarin, se mit en estat de l’aneantir, ainsi qu’il a esté remarqué
au commencement de ce discours : Messieurs du Parlement
s’y opposerent, ne voulurent la faire executer suiuant sa forme &
teneur, ainsi qu’il leur estoit mandé par icelle. Le Cardinal Mazarin
se voyant par ce moyen privé de toutes ses esperances, & en
estat de ne pouuoir euiter la recherche & la punition de ses malefices,
s’il ne perdoit le Parlement : Il se resolut à cette cruelle entreprise,
& pour la pouuoir executer auec plus de facilité & d’authorité,
il enleua le Roy, & fist boucher de toutes parts le passage
des viures à la Ville de Paris, par des gens de guerre, pour l’obliger
par la faim de luy liurer le Parlement, ou du moins les enuelopper
tous dans vne mesme ruine. Que pouuoient donc faire Messieurs
de Parlement en vne si estrange conioncture ? qu’opposer la legitime
& veritable authorité du Roy, qu’ils tiennent à present en
depost contre celle qui n’en a que l’apparence, & declarer perturbateur
du repos public, & ennemy du Roy & de l’Estat, l’autheur
d’vne si estrange tyrannie, & la cause notoire de tant de malheurs,
& tant pour l’execution de leur Arrest, que pour la conseruation
de la Ville de Paris, & de leurs propres vies, employer les armes
que les Rois leur ont mis en main, pour appuyer l’execution de
leurs iugemens, afin que la force en demeure à Iustice. Quoy !
Messieurs du Parlement seront ils coulpables pour auoir tendu la
main à plusieurs personnes de marque, qu’on a longuement detenus
en prison, sans aucun sujet ? Pour auoir veu auec emotion la
calamité de ceux qui ont esté deportez & faits mourir secrettement
sans forme de Iustice ? Pour auoir asseuré du moins pour l’aduenir,
la vie, & les fortunes de tous ceux qui subsistent encore alencontre
d’vne si rude & si estrange façon d’agir ? Pour auoir apporté