I’espere que LOVYS DIEV-DONNE, Nostre
ieune Prince surpassera tous ses Ayeuls en pieté.
& en Religion ; i’espere que son esprit se formera
des sa tendre ieunesse, à l’air des Royales
vertus, & particulierement de celle, dont nous
venons de parler, qui tient le premier rang entre
les vertus Morales, & doit estre fort considerable
à vn ieune Seigneur, afin de reussir dans son gouuernement.
I’espere que les rares traicts de Religion,
que LOVYS LE IVSTE d’heureuse memoire,
a laissé à toute la posterité, feront tant
d’impression sur le cœur du legitime successeur de
sa Couronne, qu’il suiura ses vestiges, & n’estimera
rien tant que les affaires, qui toucheront
l’honneur, & la gloire de la Diuinité.

Il ne faut point douter que l’exemple continuel
de la Reyne Regente, sa tres-sage, tres-prudente,
& tres-vertueuse Mere, ne distille en
l’ame de nostre ieune Monarque, les inclinations
à la saincteté, & à la Religion, particulierement
si nous prenons garde au soin qu’elle
employe à son instruction, aux discours de pieté
qu’elle luy tient : aux gouuerneurs qu’elle a choisis
pour sa conduitte, & aux prieres continuelles
qu’elle fait faire pour la personne Sacrée de sa Maiesté ;
que Dieu ne manquera pas de perfectionner
par les dons de grace, & de nature, pour la
consolation de toute la Monarchie Françoise.