Ministere, que l’Estat ne peut estre mieux gouuerné, que
le Cardinal Mazarin a remedié à tous les desordres, & qu’il
est digne de la place qu’il tient parce que vous estes reconciliez ?
Triste & fatale condition des peuples ! Si leurs calamitez
ne sont considerables, & si leurs pleintes ne sont justes,
que suivant les interests de ceux dont ils reputent le
merite & la naissance, & pour lesquels ils ont voulu donner
si liberallement & leurs biens & leurs vies. Lasche, ingrat,
& perfide comme il est, pense-t’il n’estre plus l’object de nostre
haine, parce qu’il est devenu celuy de vostre amitié ?
Et croit-il s’estre despoüillé de toute l’infamie qui nous le
rend odieux, en faisant par tout où il va vne abjuration publique
de son nom ? Croit-il regagner les cœurs, en disant
qu’il n’est plus Mazarin, & qu’il est Frondeur ? Cette raillerie
indigne d’vn premier Ministre peut seduire pour vn tẽps
quelques-vns de la populace : mais lors qu’ils s’apercevront
que ce dangereux serpent n’a quitté sa peau, que pour en
reprendre vne nouvelle, qu’il ne les a embrassez, que pour
avoir le moyen de les estouffer ; La juste colere que les flatteries
de ce fourbe avoient assoupie & enchantée, se réveillant
tout à coup, & rompant le charme, éclatera avec autant
de chaleur, que lors qu’elle estoit animée par vostre Evangile :
& peut-estre que les inclinations qu’ils avoient pour
vous, quand vous estiez son ennemy, changeront au grand
desadvantage de nos interests, lors qu’ils vous trouveront
dans son party. La pente naturelle qu’il a vers tout ce qui
peut causer la desolation du Royaume, & la ruine des plus
fidelles sujets du Roy, leur fait pousser des soûpirs & verser
des larmes ameres quand ils voyent que par vostre appuy, il
se raffermit dans la mesme authorité, que vous avez tant de
fois apellée tyrannie. C’est vn pecheur incorrigible, qui ne
peut surmonter les mauvaises habitudes d’ignorance, de
malice, de bassesse, & d’ingratitude, qu’il a contractées dans
le Ministere. Il a beau, comme vn acteur de theatre, estudier
toutes ses actions pour tromper les yeux de ceux qui l’observent ;
il y a tousiours quelque chose du vieil Mazarin, qui

Page précédent(e)

Page suivant(e)