esleue assez sans les esleuer dauantage. C’est pour cela
qu’autrefois on ne leur donnoit iamais de Gouuernemens
ny de places fortes.

Mais ce qui nous doit encore empescher d’entrer si
aueuglement dans les interests de ceux qui nous recherchent
auiourd’huy auec tant de carresses & de belles protestations,
c’est que nous n’y voyons pas la confiance entiere.
C’est vne verité qui est tous les iours dans la bouche
du peuple, & qu’il connoist à ses despens que les Princes
font tousiours leurs affaires, & non pas celles du public.

On dit mesme que ceux qui nous promettent auiourd’huy
de belles choses pour nous engager auec eux, les
ont promises autre fois, & qu’ils ne les ont pas tenuës.

La renommée a publié que dés le commencement de
nos affaires, & auparauant le blocus de Paris, ils auoient
promis à quelques vns qu’ils seroient nos Protecteurs,
cependant on les vit incontinent apres, à la teste des
troupes ennemies.

Leurs inclinations, ou plustost leurs interests ayant
changé quatre ou cinq mois apres la Paix faite, ils nous
eschapperent bientost & à grand nombre de personnes
illustres, qui s’estoient genereusement vnis au dessein
qu’ils auoient fait paroistre auec beaucoup d’éclat. Pour
auoir fraternisé quelque temps auec nous, ils ne nous
furent pas dans la suite plus fauorables, ils tascherent de
faire perir nos Liberateurs & nos Heros par des voyes
toutes contraires à nos mœurs, & à nostre franchise.

Depuis qu’ils sont sortis de prison, ils n’en ont pas fait
meilleur visage à ceux qui auoient le plus trauaillé à leur
liberté, au contraire, ils les ont persecutez. Ils n’ont pas
craint de releuer en public les conseils qu’ils auoient demandé
auec instance, & qu’on leur auoit donnez auec
la sincerité du cœur.

Ils ne semblent pas desnier absolument dans la Réponse
qu’ils ont faite à l’Escrit du Roy, n’auoir rien sçeu du
changement de Conseil qui fut fait à Pasques dernier,
mais qu’ils n’y auoient pas entierement resisté. Cependant