Le Dauphin Charles ayant assemblé les trois
Estats à Paris pour pourueoir à la liberté du Roy
son pere, & aux necessitez de son Royaume, la
Cabale des 50. changea ce pieux & sage dessein
en la proposition hors de propos, de rechercher
l’abus des Financiers & les dons des fauoris, d’éloigner
les premiers Ministres du Conseil, &
d’eslargir le Roy de Nauarre, que ses conspirations
secretes auoient fait emprisonner ; Le Dauphin
les amuse de paroles, les entretient de promesses,
& les refroidit auec le temps. Les Parisiens
se rechaufferent à ces cendres, deliurent le
Roy de Nauarre contre le consentemẽt du Roy,
se parent des marques de party, courent sur les
seruiteurs du Dauphin, assassinẽt ses Mareschaux,
remplissent son Conseil, inuitent les autres Villes
à porter leurs couleurs, & à entrer dans leur
Vnion ; Le Nauarrois s’estant retiré de Paris pour
broüiller à la campagne, le Dauphin prend le titre
de Regent, arme & sort de Paris, où il n’estoit
pas en liberté, est inuité par les Parisiens de reuenir
& les refuse : Le Nauarrois y retourne, les assemble,
leur parle, on luy crie, viue Nauarre, on
declame contre les Officiers du Regent, & le
mauuais gouuernement, on eslit ce Roy Capitaine
de Paris, & escrit-on aux autres Villes
qu’elles eussent à l’eslire Lieutenant general du
Royaume, tant cette Ville insolente faisoit peu
de difference entre Lieutenant de l’Estat, & Capitaine
de Paris ; Ramassez les diuers temps qui
partagent le cours irregulier de nos desordres, &
vous verrez le rapport de la nouuelle Paille de