Paris auec son ancien Chapperon ; Son attentat
ne fust suiuy que de l’indignation des Prouinces
comme à present, graces à Dieu, sa rebellion redouble
leur obeïssance, il immola peu apres son
Preuost des Marchands & ses complices aux ombres
innocentes des Mareschaux, & achepta de
leur sang la presence de son Roy ; Nous demandons
moins à son repentir, & souhaittons plutost
la conuersion que la mort de son Tribun.

Le Duc de Mayenne suiuit les traces du Nauarrois,
lors qu’apres auoir soumis Paris par la
crainte & l’esperance, retenu prisonniers les gens
de bien, & eslargy les seditieux du Parlement, il
disposa du Royaume à sa volonté, fist proclamer
Roy publiquement le Cardinal de Bourbon prisonnier,
& prit le titre de Lieutenant general de
l’Estat : Dans cette nuit de confusion où la France
vit presentement, nous voyons reluire la vertu
de ces anciens Peres du Senat qui aymerent
mieux éprouuer la violence du Tyran que de
consentir à sa rebellion, la plus saine partie du
Parlement s’est retirée d’vn corps infecté qui
n’est plus composé que de lasches & de furieux
esclaues de la crainte & de passion.

Voila comme la qualité de Lieutenant general
contre le consentement du Roy n’est pas nouuelle,
comme la Pourpre dérobée a desia paru sur
les espaules des deux grands Vsurpateurs ; Ce qui
me fait cõclure contre vous que si l’on conuainc
vne opinion d’erreur en monstrant qu’il n’y a que
les heretiques qui l’ayent tenuë, par la mesme
raison la qualité que vous laissez prendre à vostre