Romains, qu’il n’entreprenne aucune chose que par
les conseils de quelque Egerie, ie veux dire, par les
sages aduis de quelque Ministre, dont la pieté soit
reconnuë. Il est vray qu’il est bien difficile de faire
vn choix qui soit iuste en ces rencontres ; il arriue
presque tousiours que les mœurs du plus sage se corrompent,
quand il approche des Roys, & que souuent
le Ministre vse auec insolence de l’authorité que
le Prince luy donne. Quant à moy i’approuue fort
la loüange qu’vn Orateur Grec donne à vn de ses Heros,
il a voulu, dit-il, que les reuenus des Temples,
& des choses sacrées fussent les richesses des Prestres ;
Et par ce que leur profession demande vne extréme
saincteté, il a donné ordre que toute leur vie fust vne
temperance perpetuelle. Cette Maxime est vne des
plus importantes pour la conduitte des Princes, & ie
m’estonne de ce que Busire qui a esté diffamé par
toutes les plumes, soit loüé par celle du plus poli
d’entre les Orateurs Grecs. Celuy que l’on propose
chez tous les Autheurs pour vn meschant modelle
de cruautez, a trouué en ce bel esprit de l’antiquité vn
celebre Panegiriste, & peu passer en cét ouurage
pour vn exemplaire de vertus Royalles. On pourroit
dire en quelque sorte que ce docte Grec a employé
tout son fard pour embellir vn monstre, s’il est vray
qu’vn monstre puisse estre paré. Il faut auoüer que le
choix d’vn bon Ministre d’Estat est de tres grande imimportance,
& tres vtile aux Rois : c’est pour ce sujet
qu’Achille chez le Prince des Poëtes Grecs ne parle

Page précédent(e)

Page suivant(e)