pied aux plus formidables armées qui faisoit trembler les
Provinces, les Roys, & mesmes les Empereurs, venoit
fléchir le genoüil devant cette Idole de Verre, & luy
faire hommage de ses triomphes ; quoy qu’il les eust
gaignez par vne valeur singuliere ; quoy qu’il sceut que
l’autre en empéchât les fruits, & qu’il traversât sa fortune
& sa reputation par vne malice inconcevable.

C’est à ce Prince, Monseigneur, à qui vous devez parler
comme à vostre pupille, qu’il faut que vous appreniez
le tort qu’il s’est fait d’avoir méprisé l’adoration
d’vne nation entiere, & d’avoir fait comme à l’envy
tout ce qu’vn Roy pourroit attenter pour perdre l’affection
& l’amour de tous ses Sujets, par le feu, par le fer,
par les viols & les sacrileges. Nous n’avons rien de semblable
dans l’histoire de tous les Tyrans : Le soupçon ou
la crante les a portez à des meurtres infinis ; mais ils
n’ont iamais voulu détruire que leurs ennemis. Demandez-luy
que luy a fait Paris, à qui Henry le Grand a pardonné
le crime de la Ligue ? que luy ont fait Saint Denys,
Charenton, Lagny, Corbeil, &c. que luy a fait
toute l’Isle de France, & la pauvre Brie. Tous les Princes
les devoient haïr par jalousie des loüanges qu’elles
luy donnoient, il y regnoit par amour avec autant d’authorité
que nostre Roy par sa puissance legitime : la mesme
Iustice qui luy aqueroit tous les hommes les esloignoit
du Cardinal Mazarin envieux de sa gloire & de
son credit, & voila vn crime qu’il falloit donc venger
sur toute la France qui se plaignoit de ce berger estranger,
comme le Menalcas de Virgile en sa troisiéme
Eclogue,