à ses Sujets : autrement la relation cesse entre celuy qui
doit commander & ceux qui doiuent obeyr, & le lien
qui les vnit reciproquement pour le salut & pour la
gloire de l’Estat est absolument rompu : Le Peuple qui
s’assuiettit sous certaines conditions, comme tant de
Prouinces qui se sont volontairemẽt données aux Roys,
est dispensé de son serment quand elles ne sont plus executees.

A l’auanture donc le Fauory doit demeurer, à l’auanture
que pour vn seul homme il ne faut pas risquer tout
l’Estat : pour vn seul homme Etranger, pour vn seul
homme conuaincu d’auoir empesché la Paix generale,
pour vn seul homme qui veut eterniser la guerre, afin
qu’elle serue tousiours de pretexte à la dissipation des
biens de l’Estat.

Ouy, ouy, sage Cleobule, il y a de la difference entre
la Tyrannie & la Royauté. La Royauté gouuerne
les Peuples, pour le bien des Peuples mesmes, & sa
supreme Loy est le salut de l’Estat. La Tyrannie domine
tout par force & par violence : L’vne fait ceder l’interest
particulier au public, l’autre fait ceder le public
au particulier. En quoy les Princes trouuent certainement
leur auantage, puis qu’il est plus seur & plus glorieux
de commander à des Citoyens qu’à des Esclaues,
& qu’vn Regne de violence & de perfidie, court fortune
d’en estre accablé.

A l’auanture donc le Parlement se doit tenir ferme
& ne rien relascher de sa dignité, pour monstrer qu’il
n’agit pas tant pour luy que pour la raison & la iustice.
Au lieu de ses interests il considerera d’abord celuy du
Peuple, sans lequel il n’a que la voye des Remonstrances,
du parchemin & du papier. Il considerera les Princes
qui ont embrasse son party, tant pour auoir tousiours
ses deffenseurs prests au besoin, que pour gagner
de bonne grace ces ames Heroïques, lesquelles ne peuuent
souffrir qu’auec peine celles qui agissent timidement.