au Cardinalat ? Que n’a-t’on point promis à
Messieurs Ribier & le Feure de Caumartin pour
les engager à luy prester de l’argent ? Tous ces
deux Corinthiens ne sont ils pas interessez
dans sa fortune ? la Signora Olimpia le sçait fort
bien, & l’Abbé Charrié en diroit exactement
toutes les circonstances.

Mais pourquoy nous arrester si long-temps
à examiner le malheur de nostre Maistre & ses
iniustices, puis qu’elles sont connuës d’vn chacun.
Il est vray que pour nous plaindre de la
violence que l’on exerce en nostre endroict,
il faut donner des preuues des tirannies qu’il
a commises enuers les autres, & tesmoigner
par l’infortune de ceux-cy que nostre douleur
n’est pas particuliere. Quelqu’vn nous dira
peut-estre que nous auons mauuaise grace de
faire éclater nos plaintes à la face de tout va
peuple, qui ne sçaura pas discerner la justice
des vns ny l’injustice de l’autre : que pour nostre
reputation il falloit plustost souffrir nostre
iniure, que la repousser auec calomnie. Il est
vray que ce procedé eust esté raisonnable s’il ne
se fust point ataqué à nostre honneur : nous
auons esté obligez de deffendre nostre innocence :
car en ce rencontre le silence nous faisoit criminels
& nous rendoit incapables d’estre iamais
portez par aucune teste Ecclesiastique.