pour le bien de son fils, & du Royaume, que
cette peste ne retournast iamais en Cour.
En second lieu, il luy fit entendre, comme il
auoit pris la Croix pour aller en personne en la
Terre Saincte defendre les Chrestiens, contre
la violence des infidelles ; Puis que Dieu
ne m’a pas donné le moyen, dit-il, de faire ce
voyage, & de m’aquiter de mon vœu, voila
trente deux mille marcs d’argent que i’ay destinez
pour y enuoyer cent quarante hommes
d’armes auec tout leur train, qui y porteront
auec eux mon cœur, que ie desire y estre enterré.
Ie vous commande, & comme vostre
Roy, & comme vostre Pere, sur peine
d’encourir ma malediction, que vous deuez
grandement redouter, que vous n’employez
cette somme en aucun autre vsage ; si vous y
contreuenez, vous serez le plus malheureux
Roy de la terre. Edoüard estant mort, ce nouueau
Prince oublia tout ce qui luy auoit esté
ordonné, & n’executa aucun des commandemens
du defunct. Contre la volonté de tous
les Princes, il reuoqua Gauerston, & pour
vn nouueau tesmoignage d’amitié, il le fit
Cheualier, luy donnant encore les trente deux
mille marcs d’argent que son Pere auoit dediez
à secourir la Terre Saincte. Il y auoit double

Page précédent(e)

Page suivant(e)