Que vous amenera l’vne & l’autre guerre ? ie le vous diray :
nouuelles impositions, nouueaux Edicts, qui espuiesront
le peuple de ce qui luy reste de sang & substance, &
rendrez par ce moyen les champs sans labeur, le pauure
sans pain, le riche sans moyens, & en fin cét Estat à son
dernier periode.

Le commencement & continuation d’vne guerre, accumule
vne grande superfluité de mauuaises humeurs, qui
peu à peu disposent le corps d’vne Monarchie à receuoir &
endurer changement en tous ses membres : Car la guerre
est la mere nourrice de toute licence & impunité, laquelle
dispence & exempt vn chacun de la sujection des loix, &
du commandement de ses superieurs, qui est le seul & vnique
moyen par lequel la liaison & vnité d’vn peuple se
vient à dissoudre.

Rendez-vous sage par nos exemples domestiques, & suiuez
la trace qui vous a esté batuë parle feu Roy (que Dieu
absolue) pendant douze années entieres. Il auoit apris le
danger que porte quant & soy vne guerre. Recherchez la
paix tant dedans, que dehors le Royaume : par elle vous
conseruerez l’Estat, aurez moyen de soulager le peuple, &
le descharger d’vn si lourd faix qu’il porte il y a si long
temps. Faites que vostre vie soit vne viue pinture de l’heureuse
condition d’vn peuple exempt des calamitez & miseres
de la guerre. Où pourriez vous chercher la guerre pour
iouïr d’vne paix absoluë ? La guerre ne se doit entreprendre
que pour empescher que le peuple ne soit affligé dedans
vne paix.

Il est bien vray qu’encores que vous ayez la paix auec les
sujets du Roy, & tous vos voisins, si ne l’a deuez vous tenir
pour si arrestée que la guerre ne se puisse esmouuoir : C’est
pourquoy, si le trouuez bon, il vous faut entretenir gens
de guerre dans les garnisons frontieres pour crainte d’estre
surprise & batuë à l’impourueu. Toute paix sans armes est
foible.