pas fait lors que Sainct Louys les conduisoit en
la Conqueste de la Terre Sainte ? Que n’ont-ils pas
fait lors que les Romains les voulurent assujettir,
& que n’ont ils pas fait durant qu’ils se rendirent
maistres de la ville de Rome. Mais, SIRE, sans
aller chercher des exemples dans des temps si esloignez
de nous, que n’ont-ils pas fait sous le Regne de
Louys le Iuste vostre tres-honnoré Pere, dans toutes
les guerres estrangeres & domestiques que nous
auons euës. Et certes, SIRE, que n’ont-ils pas fait
sous le vostre, conduits par Monsieur le Prince. Les
insignes progrez qu’il a faits dans la Flandre pour
la gloire de vostre nom, & pour l’accroissement de
cette Monarchie ne sçauroient passer que pour des
miracles dans l’esprit des plus clairs voyans, tant ils
sont d’vne nature inconceuable. Vostre Maiesté
qui n’auoit autre intention de faire la guerre que
pour auoir la paix, voyant que ce Prince auoit toutes
les qualitez d’vn illustre Conquerant, & que sa
condition de premier prince du Sang luy donnoit
vn grand credit sur tous les principaux de l’armée,
l’obligea de s’en aller en Flandre où il gagna des
Batailles, & fit des Conquestes que la posterité ne
pourra iamais croire, tant ces actions semblent
estre au dessus de la portée des hommes. Quiconque
n’a pas vn grain de foy pour les miracles, n’en
aura iamais pour des actions de cette nature, s’il ne
la veut liberalement donner à la complaisance, ou
bien à la gloire d’vn corps dont il se peut dire estre
vne partie.

I’ay veu, i’ay vaincu, disoit Alexandre : mais ce
Prince en pouuoit bien dire de mesme, puis qu’il a
forcé vingt-quatre ou vingt-cinq places, & gagné
quatre ou cinq sanglantes Batailles, contre toute
forte d’apparences humaines. A t’il iamais rien fait