l’a fait connoistre : Mais qu’ils disent plûtost,
qu’il falloit ouurir les portes de la Ville à nos ennemis,
meslez dans vn deplorable desordre parmy nos
fideles Habitans, qui eussent couuert les ruës de leurs
corps, s’ils n’eussent eu encores assez de force pour
aller expirer entre les bras de leurs femmes & de leurs
enfans, pour causer dans Paris vne consternation
épouuentable. Les plus intelligens de cette multitude,
qui se destruit souuent elle-mesme, ayans veu
le poste aduantageux de l’Armée ennemie, & tant de
Soldats aguerris en bataille, & consideré au retour le
peril où ils s’estoient exposez, l’ardeur de leur courage
ayant fait place à leur iugement, ont auoüé qu’ils
estoient redeuables de leur vie, ou de leur liberté, à
la sagesse de ce General, qui espere que bien tost les
Troupes soudoyées estant égales en nombre à celles
des ennemis, il menera ces braues Habitans, non pas
à la boucherie, ny comme compagnos d’vn sanglant
combat, mais comme spectateurs d’vne Victoire
qu’il attend du Ciel, en faueur d’vne si iuste cause.

Faut-il que ie defende Monsieur le Duc d’Elbeuf
du costé de l’interest, luy qui ne connut de sa vie que
celuy de ses Amis ou de ses seruiteurs ? I’espere qu’il
excusera mon zele, si ie fais voir sa generoisté. Son
Intendant a touché quarente-cinq mil escus de l’argent
de la Ville, & les a payez en mesme temps à ceux
qui ont pris le soin de la leuée de huict Compagnies
de Caualerie, & d’vne de ses Gardes. Il y a quatre
semaines qu’il en a porté les acquits chez Monsieur
le premier President & à la Ville, & s’est sousmis
à toutes les peines, au cas qu’il en eust esté diuerty