aussi arriuent-ils rarement, C’est pourquoy il cause de
l’admiration & de l’estonnement à ceux qui le voyent &
entendent parler.

Les Philosophes, comme Aristote & Pline, & les Medecins,
comme Hypocrates, Galien, Auicennes & autres
n’ont pas peu trauaillé pour en sçauoir les causes & la raison
de telles naissances monstrueuses : les vns en ont escrit
d’vne façon, & les autres d’vne autre auec diuerses oppinions
& sentimens, mais peu approchant de la verité,
d’autant que des choses contingentes, fortuites & accidentaires,
il n’y a aucune science fondee sur des raisons
& des demonstrations certaines & asseurees, ce qui fait
que souuentefois l’on met telles imperfections de nature,
extraordinaires entre les prodiges, pour n’en pouuoir penetrer
les veritables causes, occultes & cachees.

C’est pour venir au suject de la naissance monstrueuse
arriuee au mois de Iuillet dernier au pays de Hurpois
en vn bourg appellé vulgairement Sept-fons prés la ville
de Sainct Fargeau & de Mezil au Diocese d’Auxerre, en
voicy le discours au vray, selon qu’il a esté enuoyé dudit
bourg de Sept fons & de Mezil, qui en est fort proche :
la chose est d’autant plus curieuse qu’elle est merueilleuse
& presques sans exemple, & partant digne d’estre imprimee
pour le contentement du public.

Il faut donc sçauoir que dans ledit bourg de Sept-fons,
& joignaut la Chapelle dite de Nostre Dame, est
le logis d’vn certain nommé le Masson, assez connu
par tout le voisinage, la femme duquel estant enceinte
& arriuee au terme de ses couches pour estre deliuree