luy prononce presentement son Arrest.

Le Pres. Sire, vous auez oüy la Remonstrance que le Conseil a
faite à la Chambre au Royaume contre vous : vous vous pouuez
bien souuenir (& la Cour ne le peut pas oublier) combien vous auez
dilayé, il vous a pleu de proposer quelques questions, & la
Chambre vous en a donné solution. On vous a dit plusieurs fois
que la Chambre vous asseure de sa Iurisdiction, que ce n’estoit pas
à vous ny à aucun autre à contester la Iurisdiction de la supréme &
tres-haute authorité d’Angleterre, de laquelle il n’y a point d’appel,
& touchant laquelle il ne faut point entrer en contention, &
neantmoins vous auez tousiours persisté à ne luy obeïr en aucune
façon, & n’auez pas reconnu qu’elle eust aucun pouuoir, ny mesmes
la Chambre haute laquelle a estably cette Chãbre de Iustice.

Sire, il faut que ie vous die de la part de la Chambre que vos delais
lui sont fascheux, & que vous ne deuez pas vous ioüer, ainsi
d’elle, estant authorisez par le Grand Conseil d’Angleterre, &
qu’elle pourroit bien auec iustice s’auãtager de ces delays & proceder
à la prononciation de vostre Arrest, & neantmoins c’est leur
bon plaisir de vous donnera dresse, & en leur nom ie vous interpelle
de répondre positiuement aux charges déposez contre vous, &
pour parler ouuertement la Iustice n’a point égard aux qualitez
des personnes, c’est à vous à donner Response finale (en bon Anglois)
si vous estes autheur des trahisons à vous imposez ou non.

Le Roy apres vne petite pause, dit :

Quand ie fus icy hyer, ie demanday à parler pour les libertez de
la Nation Angloise, & ie fus interrompu, ie demande derechef si
ie puis parler librement ou non ?

Le Pres. Sire, vous auez desia eu la Resolution de la Chãbre sur
ce sujet & on vous dit qu’estant accusé de crimes de cette nature,
c’estoit à vous à recognoistre la Iurisdiction de la Chambre & répondre
à vos charges, si vous n’y répondez, ce que la Cour vous
permet de faire à present, encore qu’elle pût prendre aduantage de
vostre mépris, toutesfois si vous pouuez vous iustifier, quand vous
aurez répondu, vous serez entendu à loisir, & deffendez vous le
mieux que vous pourrez : mais, Sire, il faut que ie vous die de la
part de la Chambre & de son Commandement, qu’il ne vous est
pas permis de sortir de vostre sujet pour entrer dans vn autre discours,
iusques à ce que vous ayez répondu positiuement touchant
vos accusations.