Le Pres. La Chambre a desia entré en consideration touchant
sa Iurisdiction, & vous en ont asseuré, si vous ne voulez répondre
nous corrigerons vostre deffaut.

Le Roy. Vous n’auez iamais entendu ma raison.

Le Pres. Sire, vos raisons ne doiuent pas estre ouyes contre vne
Chambre Souueraine.

Le Roy. Faites-moy voir vne Iurisdiction où l’on n’entende pas
les Raisons ?

Le Pres. Sire, nous vous monstrons icy les Communes d’Angleterre,
& quand l’on vous ramenera vous sçaurez plus amplement
le plaisir de la Cour, & peut-estre sa resolution finale.

Le Roy. Faites-moy voir où la Chambre des Communes a iamais
exercé la Iudicature de cette sorte ?

Le Pres. Sergent, ostez ce prisonnier.

Le Roy. Bien, Monsieur, souuenez vous que l’on ne permer pas
au Roy de dire ses Raisons pour la liberté & franchise de tous ses
subiects.

Le Pres. On ne vous doit pas souffrir tenir ce langage, que tout
le monde iuge si vous auez bien maintenu les Loix & libertez des
subjects.

Le Roy. Et de grace, Monsieur, i’ay tousiours entrepris à soustenir
les Loix, libertez & franchises des subiects, ie n’ay iamais pris
les armes contre le peuple, mais pour maintenir les Loix.

Le Pres. Il faut obeyr au commandement de la Cour, il ne veut
pas respondre aux charges à luy imposez.

Le Roy.Bien, Monsieur.

Et ainsi le Roy fut conduit au logis du Cheualier Robert Cotton,
& la seance remise au lendemain.

Et le Mardy deuxiesme iour de Feurier la Chambre de Iustice
prit derechef seance en la salle de Vvestminster pour proceder cõtre
le Roy au nombre de septante-trois : le Roy vint accompagné
de sa garde, iettant vn regard severe dessus l’assemblée, & s’assit.

Le sieur Cooke solliciteur general remonstra à la Cour que comme
le prisonnier estant à la Barre, au lieu de répondre aux charges
à lui imposez, contestoit tousiours l’authorité de la Cour, que selon
la Loy, si vn prisonnier se laisse contumacer par mépris, & ne
donne pas vne resolution finale, par laquelle voye il puisse estre examiné
selon le droit, c’est vne coufession tacite, le crime est comme
aduoüé, comme l’on a veu agir contre des personnes qui le
meritoient mieux que ce prisonnier : & partant demande que l’on