injure si nous trompons leur attente, & si nous retournons
sans auoir l’honneur de suiure Vostre Majesté
ou à tout le moins sans leur porter le jour de vostre retour
& l’ordre pour vostre reception.

Ha, SIRE, ne leur refusez pas cette grace, laissez-vous
vaincre à leurs larmes rendez-vous à l’interest de
nostre repos, mais rendez-vous plustost à l’interest
de vostre seruice dans lequel nous trouuerons toûjours
nostre repos, comme c’est l’vnique object qui
nous anime, & nostre veritable passion d’y contribuer
par tout ce qui dependra de nous pour faire cognoistre
à Vostre Majesté que nous sommes sans reserue
ses tres-humbles tres-obeïssans, & tres-fidelles seruiteurs
& sujets.

Ce discours fait au gré de tous les Deputez, qui ont
tesmoigné qu’il auoit esté en toutes ses parties conforme
à leurs intentions. Le Roy fist de sa bouche la
response qui suit.

MESSIEVRS, Ie me souuiendray toute ma
vie du seruice que vous m’auez rendu en cette
occasion ; Ie vous prie aussi de vous assurer tousiours
de mon affection : quoy que les affaires que m’ont
suscité ceux qui se sont reuoltez contre moy, me peussent
obliger à faire d’autres voyages, neantmoins puis
que vous me tesmoignez le desirer, j’ay resolu d’aller
à Paris au plustost : Ie feray sçauoir au Preuost des
Marchands & Escheuins ce qui est necessaire pour
cela.