qui tint Iulius Cæsar, ie trouue que c’est la plus belle
qu’on y puisse prendre. Premierement il essaya par
clemence, à se faire aimer par ses ennemis mesmes, se
contentans aux coniurations qui luy estoient descouuertes,
de declarer simplement qu’il en estoit aduerty :
Cela fait, il prit vne tres-noble resolution,
d’attendre sans effroy & sans solitude, ce qui luy en
pourroit aduenir, s’abandonnant & se remettant à la
garde des Dieux & de la fortune. Car certainement
c’est l’estat où il estoit quand il fut tué. Vn estranger
ayant dit & publié par tout qu’il pourroit instruire
Dionysius Tyran de Syracuse, d’vn moyen de sentir
& descouurir en toute certitude, les parties que ses
sujets machineroient contre luy, s’il luy vouloit donner
vne bonne piece d’argent ; Dionysius en estant
aduerty, le fit appeller à soy, pour s’esclaircir d’vn art
si necessaire à sa conseruation : cét estranger luy dit,
qu’il n’y auoit pas d’autre art, sinon qu’il luy fist deliurer
vn talent, & se ventast d’auoir appris de luy vn
singulier secret. Dionysius trouua cette inuention
bonne, & luy fit compter six cens escus. Il n’estoit
pas vray semblable, qu’il eust donné si grande somme
à vn homme inconnu qu’en recompense d’vn
tres vtile apprentissage, & seruoit cette reputation à
tenir ses ennemis en crainte. Pourtant les Princes sagement
publient les aduis qu’ils reçoiuent de menées
qu’on dresse contre leur vie, pour faire croire qu’ils
son bien aduertis, & qu’il ne se peut rien entreprendre
dequoy ils ne sentent le vent. Le Duc d’Athenes
fit plusieurs sottises en l’establissement de sa fraische
tyrannie sur Florence : mais cette cy la plus notable,
qu’ayant receu le premier aduis des monopoles
que ce peuple dressoit contre luy, par Matheo dit
Morozo, complice d’icelles : il le fit mourir, pour
supprimer cét aduertissement, & ne faire sentir,
qu’aucun en la ville s’ennuyast de sa domination. Il

Page précédent(e)

Page suivant(e)