Pluton.

Ils sont donc bien vaillans ces Parisiens ?

Chastillon.

Plus que par le passé, car ils se sont bien, defendus :
Clanleu qui doit estre icy deuant moy
vous en peut auoir dit des nouuelles : S’il estoit
d’aussi bonne maison comme moy la perte auroit
esté esgalle, car il estoit bien genereux.

Pluton.

Ie n’en ay point entendu parler de ce Clanleu:
Mais pour vous si tost que vous receustes le coup,
on vous asseura icy vne place.

Chastillon.

I’estois donc conneu par tout ?

Pluton.

Ie ne sçay pas, mais icy on vous connoist des
vostre naissance, & croyez que c’est vne grace
que vous auez receuë particuliere d’auoir tesmoigné
à Charenton que vous ne l’auiez pas quité,
& que si vous l’auiez abandonné pour quelque
temps, c’estoit dans l’esperance d’estre Mareschal
de France.

Chastillon.

Vous n’ignorez de rien ?

Pluton.

Non ? Dites moy ie vous prie des nouuelles de
ce Cardinal Mazarin, pour voir si elles se raporteront
à ce qu’on m’en a dit, il doit bien tost venir
resider icy, sa place est aupres de Richelieu.