pendar de Gazettier la fait passer à ceux qui n’y
ont jamais esté, pour la plus forte place dé France ;
& neantmoins ce n’est qu’vne bicoque.

Pluton.

Vne si petite place à bien fait mourir du
monde.

Chastillon.

Trop pour le bien de la France, il vaudroit
mieux que le Prince de Condé n’y eust jamais
pensé, il n’en auroit pas mal aux bourses : &
moy ie ne serois pas icy auec mon cousin de Saligny.

Pluton.

Quoy ? le Prince de Condé à mal aux bourses?

Chastillon.

Ouy, (Serenissime Hautesse :) & toute la Cour
aussi y a mal, ce qui pourroit bien estre cause
de leur perte.

Pluton.

Et les Parisiens ny ont ils point mal?

Chastillon.

Non? car il n’y a pas si long temps qu’ils sont
à cheual : & qui plus est, ils ont songé de bonne
heure à leurs affaires, ils ne mouront pas de ce
mal là, pourueu que Iean-farine les assiste. Encor
auant que de partir du bois de Vincennes on
ma dit qu’il leur a laissé des viures pour plus de
quatre mois.