raison, au dommage d’vne partie qui pour estre pauure, auoit
tort de se presenter en Iustice deuant l’iniustice. C’est la confession
qu’en font plusieurs, mesme de ceux qui en ont profité.

4. Ils ont tres bien recognus que nous allions changer de
nom en eschangeant de nature, & qu’au lieu d’estre François
nous deuiendrions Italiens & barbares ; puisque nous estions
sur le point de perdre nostre liberté, qui nous est naturelle : &
la franchise dont nous empruntons le nom que nous portons ;
aussi nous voyons que la pluspart des peuples de ce Royaume
gemissent sous le faix de sa tyrannie, accablez de miseres &
sucez iusques au sang pour assouuir la cupidité d’vn homme
insatiable, & qui n’est pas encor content d’auoir tellement
espuisé le Royaume pour s’enrichir qu’il y a peu de personnes
à la Campagne ausquels il reste vn lict pour se coucher,
moins à qui il ait laissé dequoy auoir du pain suffisamment
pour se nourrir auec son trauail & il ny en a point du tout qui
puissent viure sans incommodité ; de sorte que si les Parlemens
touchez des sentimens d’affection pour le pauure peuple
& des motifs de la charité, n’eussent arresté le cours de les
insuportables exactions, le moindre maleust esté que les peuples
fussent tombez dans l’impuissance ou dans le desespoir
auant la fin de cette annee : n’est ce pas là vne captiuité
estrange ?

5 Mais sur tout, la detention de sa Majesté Tres-Chrestienne,
fait souspirer toutes les bonnes ames des vrays François,
qui n’ont autre liberté que celle qui procede de la liberré de
leur Souuerain, comme la source & la fontaine de la leur ; helas !
Voulez-vous vn procedé plus inique d’vn meschant seruiteur
que de rendre son maistre Captif, pour vsurper son authorité,
& gouuerner à sa mode, & le Roy & ses sujets. Y a il